ភ្នំពេញ៖ នៅថ្ងៃពុធ ទី១៤ ខែកុម្ភៈ ឆ្នាំ២០២៤ នេះ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមប្រឹក្សាភិបាល នៃបណ្ឌិត្យសភាភូមិន្ទយុត្តិធម៌កម្ពុជា បានអញ្ជើញជាអធិបតីភាព និងដឹកនាំការប្រឡងប្រជែងជ្រើសរើសសិស្សចៅក្រម និងសិស្សព្រះរាជអាជ្ញា ជំនាន់ទី១២ ដំណាក់កាលវិញ្ញាសាសួរផ្ទាល់មាត់ដោយផ្ទាល់ លើមុខវិជ្ជាវប្បធម៌ទូទៅ (ពាក់ព័ន្ធវិស័យច្បាប់ និងយុត្តិធម៌) ដែលបានប្រព្រឹត្តទៅចាប់ពីថ្ងៃពុធ ទី១៤ ខែកុម្ភៈ ឆ្នាំ២០២៤ នៅមណ្ឌលប្រឡង “បណ្ឌិត្យសភាភូមិន្ទយុត្តិធម៌កម្ពុជា” ស្ថិតនៅលើមហាវិថីឈ្នះឈ្នះ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។

សូមបញ្ជាក់ថា សម្រាប់វិញ្ញាសាសួរផ្ទាល់មាត់ ក្នុងការប្រឡងប្រជែងជ្រើសរើសសិស្សចៅក្រម និងសិស្សព្រះរាជអាជ្ញា ជំនាន់ទី១២នេះ មានបេក្ខជនសរុបចំនួន ៧៥នាក់ (ស្រី ១៧នាក់) ដែលបានសម្រិតសម្រាំងចេញពីបេក្ខជន-បេក្ខនារីសរុប ៦២៣នាក់ ដែលបានចូលរួមការប្រឡងប្រជែងលើវិញ្ញាសារសរសេរ ធ្វើឡើងកាលពីថ្ងៃសៅរ៍ ទី១៦ និងថ្ងៃអាទិត្យ ទី១៧ ខែធ្នូ ឆ្នាំ២០២៣ កន្លងទៅ៕